BÚI

Kindurnar hjá Þór voru fegnar að komast í rúlluna eftir fósturvísatalninguna.
Setti nokkrar myndir í albúmið frá heimsókna til Óttars og Þórs.
 Kveðja Dóra A

Ég fór rúnt og tók myndir af lambasónarnum í dag og kom það nokkuð vel út bara hjá flestum, t.d kom mjög vel út hjá Marteini en svolítið mikið einlembt hjá Gumma en engar geldar svo það er nú plús svo endilega kíkið á myndirnar í albúminu kveðja Dísa.

Guðbrandur telur og telur en sofnar ekki. Er ekki sagt að maður eigi að telja kindur til að sofna.

HALLÓ 
Þá mætti hann Guðbrandur í dag til að telja lömbin í kindunum.  Frjósemin er ekki eins góð og seinasta ár. Talið var í 62 fullorðnum ám og 30 gimbrum. Af fullorðnum eru 4 þrílembdar og ein fjórlembd, tíu einlembdar  og tvær geldar. Átta af þessum einlembdu voru sæddar. Af gimbrunum eru 6 tvílembdar og 5 geldar. Það eru fleiri myndir í albúmi og verið nú dugleg að kvitta.
Kveðja Dóra og Bárður

Halló
Í dag fórum við til Halls bónda á Naustum til að forvitnast um sauðburð hjá honum. Hann er með 17 kindur og þegar við komum í fjárhúsin hjá honum var ein enn borin hjá honum og átti þessa fínu kolsvörtu tvílembinga. Hjá honum eru 5  ær bornar og að minsta kosti tvær í viðbót sem eru rétt óbornar.  Á Þórdísarstöðum eru líka borna tvær ær. Eitthvað hafa þessa kindur ruglast í gangmálinu því frekar óvenjulegt er að kindur beri á þessum tíma. Ekki veit ég hvort einhver hefur skýringu á þessu hjá honum Halli.
Það eru svo fleiri myndir í myndalbúminu.
Dóra A

 Halló
Hér er meira af gömlu, þessi unga snót þarna á myndinni er Dóra Aðalsteinsdóttir. Myndin er tekin í Stóru-Tungu 1971 fyrir framan Langhúsið, en svo hétu gömlu fjárhúsin sem þá voru enn í fullri notkunn.   
Kveðja til ykkar allra DA 

Halló
Hjá okkur er gamla fundargerðarbókin með stofnfundi hjá Sauðfjárræktarfélagi Eyrarsveitar.  Í þessari bók eru ótrúlega miklar heimildir um þær kynbætur sem þá áttu sér stað hjá bændum sveitarinnar. Ég er núna búin að skrifa upp fyrstu reglur félagsins og hverjir voru stofnfélagar. Geri kannski meira seinna ef vel liggur á mér.
 
Kveðja DA

Stofnfundur sauðfjárræktarfélag Eyrarsveitar

Sunnudaginn 7.des. 1952 setti formaður búnaðarfélags Eyrarsveitar Þorkell Gunnarsson, stofnfund að suðfjárræktarfélagi í Eyrarsveit. Fundurinn fór fram í samkonuhúsi sveitarinnar í Grafarnesi og var settur kl. 14:00.

Á fundinum voru mættir 10 bændur úr Eyrarsveit og auk þess Gunnar Guðbjartsson  bóndi Hjarðarfelli Miklaholtshreppi.

Þorkell Gunnarsson stjórnaði fundinum og tilnefndi Ingvar Agnarsson til að skrifa fundargerð.

Gerðir fundarins voru:

1. Gunnar Guðbjartsson gaf glögga lýsingu á störfum sauðfjárræktarfélaga, hver tilgangurinn væri, skipulag og starfsreglur, einnig sýndi hann ættbókarfærslu og skýrsluhald.
2. Borið var upp undir atkvæði hversu margir vildu gerast félagsmenn og voru 10 með.
3. Kosin stjórn: Atkvæði féllu  þannig, Ingvar Agnarsson Kolgröfum 9  atkvæði,    Þorkell Gunnarsson Akurtröðum 6  atkvæði,       Guðmundur Guðmundsson Hallbjarnareyri       6  atkvæði.                           
4. Kosnir 2 menn í endurskoðun:  Njáll Gunnarsson  Suður Bár  8 atkvæði,            Jósef  Kjartansson Nýubúð        6   atkvæði.
5. Samþykkt lög fyrir félagið.
6. Safnað undirskriftum þeirra er gengu í félagið, en þeir voru 10.
7. Fundargerðin lesin upp og samþykkt, fleira ekki tekið fyrir, fundi slitið.

                                                                Ingvar Agnarsson.   
                  

Lög Sauðfjárræktarfélags Eyrarsveitar.

1.gr.

Félagið heitir Sauðfjárræktarfélag Eyrarsveitar og nær félagssvæðið yfir Eyrarsveit.

2.gr.

Tilgangur félagsins er sá að kynbæta sauðfé félagsmanna, með tilliti til aukinna og bættra afurða, hreysti og útlits.

3.gr.

Tilgangi sínum hyggst félagið að ná: 

• Með skipulögðu úrvali úr fjárstofni þeim sem félagsmenn eiga er félagið er stofnað.
• Með því að finna erfðaeðli einstaklinga, með glöggum ættartölum, afurðaskýrslum og afkvæmarannsóknum.
• Með því að kaupa kynbótafé, til þess að fá í fé félagsmanna æskilega eiginleika, sem vantar í það.
• Með því að festa kostina í kyni og vinna að útrýmingu duldra galla með skyldleikarækt, eftir að búið er að fá féð útlitsgott og afurðamikið, með úrvali og íblöndun aðkeypts kynbótafjár.

4.gr.

Þátttaka í félaginu er bundin því skilyrði að hver félagsmaður eigi minnst 8 kynbótaær og enginn einn félagsmaður má eiga meira en helming kynbótafjárins.

5.gr.

Hver félagsmaður er bundinn eftir töldum skyldum:

·        Að halda fóður- afurða- og vigtarskýrslur yfir kynbótaféð. Kynbótaféð skal vigtað þrisvar á ári.

1. Að haustinu fyrir 20. okt.

                  2. Í janúar um eða eftir miðjan mánuð.

                  3. Í apríllok eða byrjun maí.

          Á hverju hausti skulu öll lömb undan kynbótaám félagsmanna vegin  á fæti       

          eins snemma að haustinu og við verður komið. Enn fremur skal vega fall af hverju 

         lambi fyrir sig, sem slátrað er.  Sé ekki hægt að koma því við að vega hvern skrokk    

            fyrir sig,  getur sauðfjárræktarráðunautur Búnaðarfélags Íslands veitt      

             undanþágu frá þessu ákvæði.

·        Að halda ættbók samkvæmt fyrirmælum Búnaðarfélags Íslands fyrir kynbótaféð og merkja það allt með einstaklingsmerki,  þannig að framhaldsnúmer séu notuð hjá hverjum félagsmanni. (Enn fremur skal kynbótaféð merkt með sameiginlegu félagsmerki.) Merkja skal unglömbin að vorinu og skrásetja þau svo örugglega verði séð að haustinu undan hvaða á hvert lamb er.

·        Að láta menn innan félagsins sitja fyrir kaupum á þeim kindum af kynbótafé félagsins sem þeir kunna að vilja selja, þar með talin lömb undan félagsánum, hafi þær fengið við hrút frá félagsfénu.

·        Félagsmönnum er óheimilt að slátra úrvals einstaklingum, án leyfis félagsstjórnar, vilji einhverjir félagsmenn eignast kynbótaféð. Félagsstjórnin getur ákveðið söluverðið ef samkomulag næst ekki á milli seljanda og kaupanda.

6.gr.

Félaginu skal stjórnað af þrem mönnum kosnum á aðalfundi til sex ára í senn og gangi einn úr  annað hvort ár. Sá fyrsti eftir að hafa setið í stjórn í tvö ár. Stjórnin skiptir sjálf með sér verkum, formaður, gjaldkeri og ritari  og annast öll venjuleg stjórnarstörf. Formaður og gjaldkeri skulu velja ærnar í félagið og árlega ferðast milli félagsmanna til þess að ákveða hve mikið af afkæmum félagsánna séu tæk í félagið. Lömb undan hrútum, sem ekki teljast til félagsfjárins, má ekki taka í félagið eftir að það hefur starfað í tvö ár. Enn fremur líta þeir eftir allri kynbótastarfsemi félagsins og velja þá einstaklinga sem keyptir kunna að verða inn í félagið í samráði við sauðfjárræktarráðunaut Búnaðarfélags Íslands eða búfjárræktarráðunaut viðkomandi búnaðarsambands. Heimilt er stjórninni að velja sér aðstoðarmann við starfið, sé starfssvæði félagsins stærra en einn hreppur og einnig er henni heimilt að semja við eftirlitsmann fóðurbirgða félagsins  um eftirlitið að meira eða minna leyti.

7.gr.

Framlag ríkissjóðs til sauðfjárræktarfélagsins samkvæmt gildandi búfjárræktarlögum skal renna í  félagssjóð. Stjórn félagsins varðveitir sjóðinn. Skal hún árlega fá þóknun fyrir starf sitt í þágu félagsins og ákveður aðalfundur hve mikil sú þóknun skuli vera. Nægi ekki framlag  ríkissjóðs til þess að standa straum af kostnaði við félagsstarfið er félagsmönnum heimilt á aðalfundi að leggja gjöld á félagsmenn er miðast við tölu þess fjár sem þeir eiga í félaginu. Einnig er heimilt á stofnfundi að ákveða  inntökugjald í félagið eða árgjald.

8.gr.

Þyki meiri hluta félagsmanna og stjórn félagsins æskilegt að félagið eigi sjálft kynbóta hrúta til sameiginlegra nota fyrir félagsmenn þá skal stjórn  félagsins heimilt að kaupa slíka hrúta, ef fé er fyrir hendi í sjóði félagsins. Séu hrútar keyptir sem ekki eru af kynbótafé  félagsins  þá skal hafa samráð um val  þeirra við sauðfjárræktarráðunaut Búnaðarfélags Íssland, eða héraðsráðunaut viðkomandi búnaðarsambands í búfjárrækt. Félagsstjórnin ráðstafar þessum hrútum til félagsmanna og ákveður árlega afnotagjald fyrir þá. Enn fremur skal félagsstjórnin leiðbeina félagsmönnum um hrútahaldið og stuðla að því eftir mætti að þeir geti allri notað 1. verðlauna hrúta handa kynbótaánum.

9.gr.

Heimilt er stjórn félagsins með samþykki aðalfundar eða með samþykki meiri hluta félagsmanna á öðrum fundi að verja fé úr félagssjóði til eflingar kynbóta starfsemi félagsmanna t.d. með því að styrkja þá til þess að sæða kynbótaærnar með sæði úr úrvals kynbótahrútum eða á annan hliðstæðan hátt.

10. gr.

Aðalfundur skal haldinn ár  hvert á tímabilinu frá 10.okt. til 15.nóv. fundurinn er lögmætur ef 2/3 hlutar félagsmanna eru mættir. Meiri hluti atkvæða fundarmanna ræður úrslitum mála. Á aðalfundi skal formaður gefa skýrslu yfir starf stjórnarinnar síðast liðið ár. Ritari skal leggja fram skýrslu yfir kynbótaféð og afurðir þess. Skal ræða um árangur starfseminnar á árinu og önnur þau mál sem félagið varðar í sambandi við kynbótastarfið. Gjaldkeri skal leggja fram endurskoðaða reikninga félagsins. Tveir endurskoðendur skulu kosnir á aðalfundi annað hvert ár til tveggja ára í senn.

11.gr.

Skýrsluár félagsins er frá 1.okt. til jafnlengdar næsta ár. Ritari skal árlega senda Búnaðarfélagi Íslands skýrslu, gerða eftir fyrirmælum þess um kynbótaféð og afurðir þess fyrir 1.jan. Afrit af skýrslu þessari skal ritari varðveita. Einnig skal hann leiðbeina félagsmönnum um ættbókarfærsluna eða skýrslugerð varðandi félagsféð.

12.gr.

Fyrstu 10 árin sem félagið starfar er stjórninni heimilt að taka nýja menn inn í félagið og bæta  úrvarskindum úr hjörð þeirra við kynbótafé félagsins. Eftir þann tíma er óheimilt að bæta öðru fé við kynbótafé félagsins en þeim einstaklingum sem keyptir kunna að verða til kynbóta eða þá að sannanlegt sé með ættbókarfærslu að þeir séu það blandaðir félagsfénu að þeir hafi 7/8 af eiginleikum þess.

13.gr.

Geri einhver félagsmaður sig sekan um að falsa bókhald sitt varðandi félagsféð vísvitandi eða misnota félagsmerkið skal hann skilyrðislaust rekinn úr félaginu ævilangt.

14.gr.

Leysist félagið upp, eða hættir störfum, skal sjóður sá, sem myndast hefur af starfsemi þess, afhentur Búnaðarfélagi Íslands til varðveislu. Er stjórn Búnaðarfélags Íslands heimilt að verja árlegum vöxtum hans til þess að verðlauna 1.verðlauna hrúta á því svæði, sem félagið starfaði á. Rísi upp félag á ný á sama félagssvæði skal hinn fyrri sjóður renna til starfsemi þess ef reglur þess og samþykktir, er  það starfar eftir, eru í samræmi við gildandi búfjárræktarlög og stjórn Búnaðarfélags Íslands og sauðfjárræktarráðunautur þess samþykkir.

Þessi samþykkt var staðfest í Reykjavík í janúar 1953 af dr. Halldóri Pálssyni sauðfjárræktarráðunaut.

Félagsmenn Sauðfjárræktarfélags Eyrarsveitar árið 1953.

1.      Þorkell Gunnarsson Akurtröðum

2.      Jósef Kjartansson Nýjubúð

3.      Guðmundur Guðmundsson Eyri

4.      Gunnar Þorvaldsson Skerðingsstöðum

5.      Árni Sveinbjörnsson Hellnafelli

6.      Guðni Elísson Berserkseyri

7.      Guðmundur Guðmundsson Skerðingsstöðum

8.      Elís Guðjónsson Skallabúðum

9.      Njáll Gunnarsson Suður-Bár

10.  Ingvar Agnarsson Kolgröfum

11.  Bernharð Guðnason Berserkseyri

12.  Gunnar Stefánsson Eiði

13.  Kristján Jónsson Eiði

14.  Arnór Kristjánsson Eiði

15.  Bjarni Sigurðsson Berserkseyri

16.  Hreinn Bjarnason Berserkseyri

17.  Jón Hjartarson Mýrum

18.  Magnús Gíslason Kirkjufelli

19.  Guðrún Ólafsdóttir Grafarnesi

20.  Anton Finnsson Grafarnesi

21.  Jóhann Ásmundsson Kvená

22.  Hörður Pálsson Hömrum

23.  Hallgrímur Pétursson Naustum

24.  Elías Jónsson Hallbjarnareyri

25.  Bárður Þorsteinsson Gröf

26.  Páll Torfason Garðsenda

27.  Nói Jónsson Vindási

28.  Sigurður Stefánsson Þórdísarstöðum

29.  Ingimundur Gíslason Bakka

Skrifað upp úr fundargerðarbók Sauðfjárræktarfélags Eyrarsveitar.

Dóra Aðalsteinsdóttir  9. jan. 2010